Ўзбекистон Суперлигасининг 8-турида Жиззахдаги «Зомин» марказий стадионида ўтган баҳсда «Бунёдкор» иродали ўйин намойиш этиб, «Сўғдиёна»ни 3:2 ҳисобида мағлуб этди.

Учрашув майдон эгалари учун жуда омадли бошланди. 4-дақиқада Мулич томонидан етказилган узатмани Люпчо Дориев дарвозага жойлаб, ҳисобни очди. VAR текширувидан сўнг гол инобатга олинди. 26-дақиқада эса ўша Дориев дубль расмийлаштириб, ҳисобни 2:0 кўринишига келтирди.

Шундан кейин «Бунёдкор» ҳужумга ўтди ва биринчи бўлим охирида муҳим гол урди. 39-дақиқада Билолхон Тошмирзаев индивидуал ҳаракатлари билан фарқни қисқартирди — 2:1.

Иккинчи тайм бошланиши биланоқ меҳмонлар яна фаолликни оширди. 50-дақиқада Тошмирзаев жарима зарбасини голга айлантириб, ҳисобни тенглаштирди — 2:2.

Учрашув тақдирини эса айнан шу футболчи ҳал қилди. 69-дақиқада «Бунёдкор» футболчилари ташкил этган чиройли комбинацияни Билолхон Тошмирзаев гол билан якунлаб, хет-трик қайд этди — 2:3.

Қолган вақтда «Сўғдиёна» ҳисобни тенглаштириш учун босимни кучайтирди, бир неча хавфли вазиятлар юзага келди. Аммо меҳмонлар дарвозабони ишончли ҳаракат қилди ва жамоасига ғалабани сақлаб қолишга ёрдам берди.

Шу тариқа, «Бунёдкор» 0:2 ҳисобидан ортга қайтиб, жуда муҳим ғалабага эришди. "Қалдирғочлар"нинг очколари 16 тага етди ва жамоа жадвалда 4-ўринга кўтарилиб олди. "Сўғдиёна" эса 5 очко билан 15-поғонада қолди.

Ўзбекистон Суперлигаси, 8-тур
19 апрель 2026 йил. Жиззах, «Зомин» стадиони
«Сўғдиёна» — «Бунёдкор» 2:3 (2:1)
Голлар: Люпчо Дориев 4 (1:0), Люпчо Дориев 26 (2:0), Билолхон Тошмирзаев 39 (2:1), Билолхон Тошмирзаев 50 (2:2), Билолхон Тошмирзаев 69 (2:3)