Бугун Тошкент вақти билан соат 20:00да ўсмирлар ўртасидаги жаҳон чемпионатига қуръа ташлаш маросими бошланади. Қуръа учун барча нарса тайёр.

Қуръа олдидан матбуот анжумани ўтказилди ва унда иштирок этган ФИФА томонидан 17 ёшгача бўлган футболчилар ўртасидаги ЖЧ ташкилий қўмитаси раиси Рафаэль Салгуэро қуйидагиларни таъкидлаб ўтди:

"Мен Амирлик давлатига ФИФАнинг йирик мусобақаларидан бирини қабул қилаётгани учун миннатдорчилик билдираман. Ушбу мусобақада эртанги кун юлдузлари "туғилади" десам муболаға бўлмайди. Бунгача ҳам БААда йирик мусобақалар ўтган ва буниси ҳам яхши савиядаги ўтказилишига ишончим комил".

"Мен мусобақа ғолиби номи аниқланадиган 8 ноябрни интизорлик билан кутяпман. Ўша куни мусобақани яхши ўтказиб олганимиз борасида қониқиш ҳисси ҳосил қиламиз, деб ўйлайман. Турнир нафақат БАА тарихида, балки барча 24 иштирокчи тарихида яхши из қолдиради деб умид қиламан", деди ФИФА вакили.

Матбуот анжуманида қуръа механизми ҳақида ҳам гап борди. Ташкилий қўмита қарорига кўра, мезбон — БАА терма жамоаси ўз қитъасининг чемпионлари билан бир гуруҳга тушмайдиган бўлди. Аргентина (КОНМЕБОЛ), Ўзбекистон (ОФК), Кот-д'Ивуар (Африка), Мексика (КОНКАКАФ), Россия (Европа) ва БАА терма жамоалари биринчи саватчадан ўрин олишган.

БАА терма жамоаси "А" гуруҳининг 1-поғонасидан ўрин олади ва улар ўз ўйинларини Абу-Даби шаҳрида ўтказишади. ФИФА регламентига мувофиқ, бир қитъа вакиллари бир гуруҳдан ўрин олишмайди. Демак, Осиёнинг бошқа жамоалари "А" гуруҳига тушишмайди.

БААдаги мусобақада маҳаллий ташкилий қўмитада ишлаётган ҳамюртимиз Алишер Никимбаевнинг Stadion.uz'га хабар беришича, Ўзбекистон ўсмирлар терма жамоаси ўз ўйинларини Фужейра шаҳрида ўтказади. КОНМЕБОЛ чемпиони Аргентина ўз ўйинларини Дубайда ўтказса, Россия Шаржадаги гуруҳда иштирок этади. Кот-д'Ивуар Рас-ал-Хаймада, Мексика эса Ал-Айнда ўз ўйинларини ўтказади.

Эслатиб ўтамиз, ўсмирлар ўртасидаги жаҳон чемпионати 17 октябрь куни бошланади ва 8 ноябрга қадар давом этади.