Якшанба куни Премьер-лига чемпионлиги учун пойгада янги бурилиш юз берди: «Манчестер Сити» «Арсенал»ни мағлуб этиб, биринчи ўринга яқинлашиб олди. Учрашув Хосеп Гвардиола жамоасининг 2:1 ҳисобидаги ғалабаси билан якунланди.
Эндиликда «канонирлар» билан орадаги фарқ бор-йўғи уч очкони ташкил этмоқда, шу билан бирга «шаҳарликлар» ихтиёрида ҳали битта қолдирилган ўйин бор. Баҳс якунланганидан сўнг Sky Sports экспертлари мавсум якунида Премьер-лига чемпионлигини ким қўлга киритиши ҳақидаги саволга жавоб беришди.
Майка Ричардс: «Кубок ленталари мовий рангда бўлади. "Манчестер Сити" бугун ғалаба қозонди ва чемпионатда ҳам зафар қучади».
Патрик Виейра: «Қулоқ солинг, ҳали олдинда 15 очко ўйналади, лекин танлаш керак бўлса, "Сити" чемпион бўлади, деб айтаман».
Гари Невилл: «Мавсумда илк бор шуни тан олишга мажбурманки, титул "Сити"га насиб қиладиганга ўхшаяпти».
Манчестер грандига тўғридан-тўғри рақобатчи билан баҳсда Райан Шерки ва Эрлинг Холанд томонидан киритилган голлар ғалаба келтирди.
