«ПСЖ» ҳимоячиси Ашраф Ҳакимий Франция чемпионати 30-тури доирасида «Лион»га қарши ўйиндаги (1:2) мағлубиятдан сўнг рақиб ҳужумчиси Эндрик билан юзага келган келишмовчилик ҳақида гапирди.

Ўйиннинг еттинчи дақиқасида «Лион»нинг бразилиялик ҳужумчиси ҳисобни очди. Бироқ голнинг ўзидан кўра унинг нишонланиши кўпроқ диққатни тортди: Эндрик парижликларнинг ультрас-мухлислари қаршисида рақс ижро этди. Бу ҳаракат мезбон мухлисларнинг кучли ҳуштакларига сабаб бўлди ва стадиондаги вазиятни кескинлаштирди. Ашраф Ҳакимийга бу ишора ёқмади ва у гол нишонланганидан сўнг Эндрикка яқинлашиб, ўз норозилигини билдирди.

«Нима учун Эндрикка хотиржамликни сақлашини айтдим? Биз рақиб ўйинчиларига чалғиб қолмаслигимиз керак. Мен жамоам диққатини ўйинда сақлаб қолишини ва у бизнинг мухлисларимизга тегадиган ҳаракатларни тўхтатишини хоҳладим. У шунчаки футбол ўйнасин — чунки у жуда иқтидорли футболчи. Аммо у ўйинга алоқаси бўлмаган ишларни қилса, айниқса биз мағлубиятга учраётган вазиятда, бу менинг ғазабимни келтиради», — дея Ҳакимийнинг сўзларини келтиради Goal.com.