Руминия миллий терма жамоасига янги бош мураббий тайинланди. Маҳаллий ОАВ, хусусан, Digi24 телеканали тарқатган хабарларга кўра, ушбу лавозимни машҳур мутахассис Георге Хаджи эгаллади.
Маълумотларга кўра, ушбу тайинлов бўйича якуний қарор қабул қилиб бўлинган. Расмий баёнот жорий ҳафтанинг душанба ёки сешанба кунлари эълон қилиниши кутилмоқда.
Георге Хаджи ўз вақтида нафақат Руминия, балки жаҳон футболининг энг ёрқин юлдузларидан бири бўлган. У фаолияти давомида Испаниянинг гранд клублари — «Реал Мадрид» ва «Барселона» шарафини ҳимоя қилган. Шунингдек, у Туркиянинг «Галатасарой» жамоаси билан Европа майдонларида нуфузли совринларни қўлга киритган.
Тажрибали мутахассис сўнгги йилларда ўзининг қадрдон клуби — Констанца шаҳрининг «Фарул» жамоасида бош мураббий сифатида муваффақиятли фаолият юритиб келаётган эди.
