Ruminiya milliy terma jamoasiga yangi bosh murabbiy tayinlandi. Mahalliy OAV, xususan, Digi24 telekanali tarqatgan xabarlarga ko‘ra, ushbu lavozimni mashhur mutaxassis George Xadji egalladi.
Ma’lumotlarga ko‘ra, ushbu tayinlov bo‘yicha yakuniy qaror qabul qilib bo‘lingan. Rasmiy bayonot joriy haftaning dushanba yoki seshanba kunlari e’lon qilinishi kutilmoqda.
George Xadji o‘z vaqtida nafaqat Ruminiya, balki jahon futbolining eng yorqin yulduzlaridan biri bo‘lgan. U faoliyati davomida Ispaniyaning grand klublari — «Real Madrid» va «Barselona» sharafini himoya qilgan. Shuningdek, u Turkiyaning «Galatasaroy» jamoasi bilan Yevropa maydonlarida nufuzli sovrinlarni qo‘lga kiritgan.
Tajribali mutaxassis so‘nggi yillarda o‘zining qadrdon klubi — Konstansa shahrining «Farul» jamoasida bosh murabbiy sifatida muvaffaqiyatli faoliyat yuritib kelayotgan edi.













