Италиянинг «Милан» клуби германиялик ҳужумчи Никлас Фюллькругнинг трансферини тўлиқ сотиб олмасликка қарор қилди.

Маълумотларга кўра, футболчининг «Милан»даги ижара муддати кутилган натижани бермади. Фюллькруг жамоа сафида атиги битта гол уришга муваффақ бўлди холос. Шу сабабли, ҳужумчи ёзда ўзининг ҳақиқий клуби — Англиянинг «Вест Хэм» жамоасига қайтиши кутилмоқда.

Бироқ, футболчининг Англиядаги фаолияти узоқ давом этмаслиги мумкин. Айни пайтда Германиянинг «Вольфсбург» клуби Фюллькругга жиддий қизиқиш билдирмоқда. Ҳозирда Бундеслигада жон сақлаб қолиш учун курашаётган «бўрилар» ҳужум чизиғини кучайтириш мақсадида тажрибали ҳужумчини ўз сафларига қўшиб олмоқчи.

Таъкидлаш жоизки, Германия чемпионати Фюллькруг учун яхши таниш бўлган мусобақа ҳисобланади. У илгари «Боруссия Дортмунд» ва «Вердер Бремен» клублари сафида муваффақиятли тўп сурган.