«Челси» Премиер-лиганинг охирги тўртта ўйинида биронта ҳам гол ура олмасдан мағлубиятга учради. Натижада, «аристократлар»нинг Чемпионлар лигасига йўлланма олиш имкониятлари кескин камайиб кетди — лондонликлар кучли бешликдан етти очко орқада қолишмоқда.
The Touchline нашрининг хабар беришича, январда жамоани қабул қилиб олган бош мураббий Лиам Росеньорга нисбатан кийиниш хонасидаги ишонч пасаймоқда. Жамоанинг бир нечта асосий футболчилари клубга тажрибалироқ мураббий керак деб ҳисоблашмоқда.
Ушбу ўйинчилар ҳали ҳам клуб раҳбариятининг Энцо Марескани ишдан бўшатиш ҳақидаги қароридан норози. Эслатиб ўтамиз, «Челси» Марескани айнан Янги йил куни — 1 январда истеъфога чиқарган эди.
«Челси» навбатдаги ўйинини эртага, 21 апрель куни сафарда «Брайтон»га қарши ўтказади.
