Учта вазн тоифасида собиқ мутлақ жаҳон чемпиони, мағлубият нималигини билмайдиган америкалик Теренс Кроуфорд ўз фаолиятини қайта тикламаслигини яна бир бор таъкидлади. Шу билан бирга, у бошқа боксчилар фақат у кетишга қарор қилганидан кейингина жангга чорлашни бошлаганини қайд этди.
«Қулоқ солинг, мен фаолиятимни якунладим ва бундан жуда мамнунман. Бу жангларнинг барчаси мен фаол спортчи бўлган вақтимда бўлиб ўтиши мумкин эди. Уларга омад тилайман. Баъзи мухлислар учун нима қилишимнинг аҳамияти йўқ — улар мени шунчаки ёмон кўришади. Мен фаол бўлган пайтимда ҳеч ким мени жангга чорламаган эди», — дея Кроуфорднинг сўзларини келтиради The Ring журнали.
Эслатиб ўтамиз, ўтган йили Теренс Кроуфорд профессионал боксдаги фаолиятини якунлаганини эълон қилган эди. У спортни 42-0 кўрсаткичи билан, мағлубиятсиз тарк этди. Кроуфорд тарихда учта вазн тоифасида мутлақ жаҳон чемпиони бўлишга эришган илк боксчига айланди.
