“Бунёдкор” – “Нефтчи” учрашувидан кейинги матбуот анжуманида биринчи бўлиб журналистлар саволларига фарғоналиклар устози ташриф буюрди.

- Бизникилар ҳали ўйинга мослашиб улгуришмасидан “Бунёдкор” катта куч билан олдинга ўтди ва ҳисобни очди. Жамоамиз иккинчи таймда ўз ўйинини кўрсата бошлади. Бироқ вазиятлардан унумли фойдаланишимизга “Бунёдкор”нинг тажрибали футболчилари имконият беришмади. Рақибни ғалаба билан табриклайман. Улар кубок доирасидаги ўта оғир учрашувдан кейин ўзларини йўқотиб қўймагани ҳайрон қолдирди, - деб гап бошлади Амет Абдуллаевич.

- Саркисян кетганидан кейин жамоани қайта шакллантириш қийин бўлмаяптими?
- Юрий Вазгеновичнинг футболга бўлган ўз қарашлари бор, меники эса бошқача.

- Носир Отақўзиев ўз интервьюасида кам ўйнаётганини бош мураббийдан сўранг деб гапирди. У нима учун майдонга кам тушириляпти?
- Жамоамиз тактикасидан келиб чиқиб, битта ҳужумчи билан ўйнаяпмиз. Уни ҳам майдонга тушадиган вақти келади.

- “Нефтчи” еттинчи поғонадаги жамоадан беш очко кам жамғариб, 8-ўринда бормоқда. Жамоанинг мақсади қайси ўрин?
- Вазифамиз аниқ – олтинчи ўринни олмоқчимиз. Саккизинчи поғона бизга ярашмайди!