Паоло Ди Канионинг фикрича, бош мураббий Лучано Спаллетти туфайли «Ювентус» А Серияда иккинчи ўринни эгаллашга қодир.

«Сўнгги бир неча ўйинлардан келиб чиқиб айтсам, улар «Наполи» ва «Милан»га қараганда яхшироқ ҳолатда. Менимча, бу жамоа ўз мураббийига тўлиқ ишониб, унинг ортидан эргашмоқда ва ўз имкониятларини кўрсатишни истайди.

Спаллетти ҳаммасини аниқ тушунтириб берди: ортиқча босим йўқ, лекин клуб либосининг қадри ва босиб ўтилиши керак бўлган йўлнинг муҳимлигини англаш бор. У — клубнинг сўнгги беш йилдаги энг яхши хариди. У нафақат тактик жиҳатдан, балки энг муҳими — менталитет нуқтаи назаридан ҳам жамоада ўчмас из қолдирди», — деди ўз вақтида «Ювентус», «Наполи» ва «Милан» клубларида тўп сурган Ди Канио Sky Sport эфирида.

Ҳозирда «Ювентус» 63 очко билан А Серияда 4-ўринни эгаллаб турибди. «Наполи» ва «Милан» 66 очко билан мос равишда учинчи ва иккинчи ўринларда боришмоқда. Пешқадам «Интер» ҳисобида эса 78 очко мавжуд.