Paolo Di Kanioning fikricha, bosh murabbiy Luchano Spalletti tufayli «Yuventus» A Seriyada ikkinchi o‘rinni egallashga qodir.
«So‘nggi bir necha o‘yinlardan kelib chiqib aytsam, ular «Napoli» va «Milan»ga qaraganda yaxshiroq holatda. Menimcha, bu jamoa o‘z murabbiyiga to‘liq ishonib, uning ortidan ergashmoqda va o‘z imkoniyatlarini ko‘rsatishni istaydi.
Spalletti hammasini aniq tushuntirib berdi: ortiqcha bosim yo‘q, lekin klub libosining qadri va bosib o‘tilishi kerak bo‘lgan yo‘lning muhimligini anglash bor. U — klubning so‘nggi besh yildagi eng yaxshi xaridi. U nafaqat taktik jihatdan, balki eng muhimi — mentalitet nuqtai nazaridan ham jamoada o‘chmas iz qoldirdi», — dedi o‘z vaqtida «Yuventus», «Napoli» va «Milan» klublarida to‘p surgan Di Kanio Sky Sport efirida.
Hozirda «Yuventus» 63 ochko bilan A Seriyada 4-o‘rinni egallab turibdi. «Napoli» va «Milan» 66 ochko bilan mos ravishda uchinchi va ikkinchi o‘rinlarda borishmoqda. Peshqadam «Inter» hisobida esa 78 ochko mavjud.
