«Арсенал» ҳужумчиси Габриэль Жезус ва «Манчестер Сити» мухлиси ўртасида можаро юзага келди.

Футболчи АПЛнинг 33-туридан ўрин олган икки жамоа ўртасидаги баҳсни захира ўриндиғида бошлади. Ижтимоий тармоқларда 2017 йилдан 2022 йилгача «шаҳарликлар» шарафини ҳимоя қилган бразилиялик футболчининг майдон четида чигал ёзди машқларини бажараётгани акс этган видео тарқалди.

Ҳужумчининг орқасида турган «Сити» мухлисларидан бири унга қарата: «Сотқин, ҳисоб қанақа?» — деб бақирган. Бу Жезуснинг эътиборини тортди ва у мухлиснинг олдига келиб, қўли билан кўкрагига ишора қилган ҳолда: «Мен бу ерда 11 та соврин ютганман», — деб жавоб қайтарди.

Мухлис эса: «Ҳа, лекин ҳозир кимсан? Ҳозир кимсан ўзи?» — дея бақиришда давом этган. Шундан сўнг бразилиялик футболчи мухлисга ишора қилиб, қўллари билан бошида «шох» белгисини (ёки ақлдан озганлик ишорасини) кўрсатган.