«Эвертон» ҳимоячиси Жеррэд Брэнтуэйт жароҳати сабабли жорий мавсумнинг қолган қисмини ўтказиб юборади ва катта эҳтимол билан 2026 йилги Жаҳон чемпионатида ҳам иштирок эта олмайди. Бу ҳақда The Athletic нашри хабар бермоқда.
Футболчи Англия Премьер-лигаси 33-тури доирасида бўлиб ўтган «Ливерпуль»га қарши баҳсда (1:2) ўнг оёқ тизза ости пайидан жароҳат олди. Ўйиннинг 87-дақиқасида майдонни замбилда тарк этган Брэнтуэйт кейинроқ «Хилл Дикинсон» стадионидан қўлтиқтаёқда чиқиб кетган.
Жорий мавсумда Брэнтуэйт «Эвертон» сафида 10 та ўйинда майдонга тушиб, биттадан гол ва голли узатмани амалга оширган эди. Transfermarkt маълумотларига кўра, футболчининг бозор қиймати 45 миллион еврони ташкил этади.
