Мюнхеннинг «Бавария» клуби бош мураббийи Венсан Компани агар жамоани Чемпионлар лигаси ғолиблигига бошлаб келса, йирик миқдорда мукофот пули олади.
Sport Bild нашри хабарига кўра, мюнхенликлар раҳбарияти бельгиялик мутахассисга нуфузли еврокубокдаги зафар учун 1 миллион евро бонус ваъда қилган. Мазкур банд Компанининг 2029 йилгача мўлжалланган янги шартномасида кўзда тутилган. Қайд этиш лозимки, томонлар ушбу келишувни ўтган йилнинг кузида имзолаган эди.
Венсан Компани 2024 йилнинг ёзидан буён Германия грандини бошқариб келмоқда. Унинг бошқарувида «Бавария» яқиндагина Бундеслига чемпионлигини муддатидан олдин нақд қилди.
Эндиликда немис клубини ЕЧЛ яримфиналида амалдаги чемпион — "ПСЖ"га қарши жиддий имтиҳон кутмоқда. Жамоалар ўртасидаги ҳал қилувчи баҳслар 28 апрель ва 6 май кунлари бўлиб ўтади.
