Миланнинг «Интер» клуби бош мураббийи Кристиан Киву жамоадаги дебют мавсумидаёқ «олтин дубль» (бир мавсумда ҳам чемпионат, ҳам кубокда зафар қучиш) қайд этиши мумкин.

Сешанба оқшомида «нерадзуррилар» Италия Кубоги ярим финалида «Комо» устидан қийин ғалабага эришиб (3:2), финал йўлланмасини қўлга киритди. А Серияда эса жамоа чемпионликни муддатидан олдин нақд қилиш арафасида турибди.

Маълумот учун, «Интер» ўз тарихида фақат бир марта — 2010 йилда Жозе Моуриньо қўл остида бир мавсумда ҳам скудетто, ҳам мамлакат кубогида ғолиб чиққан эди.

«Сиз, журналистлар жарангдор сарлавҳаларни яхши кўрасиз. Аммо мен шунчаки Кристиан Кивуман. Ягона мақсадим — футболчиларим ўз имкониятларини тўлиқ намоён этишлари учун қўлимдан келган барча ишни қилиш. Менга ишонган инсонлар учун ўз вазифамни сидқидилдан бажаришга ҳаракат қиляпман, холос», — деди Киву.

Қайд этиш жоизки, Кивунинг ўзи 2010 йилдаги ўша машҳур «Интер» сафида тўп сурган. Ўша мавсумда миланликлар ички аренадаги муваффақиятларга Чемпионлар лигасидаги зафарни ҳам қўшиб, «требл» қайд этишган эди.