Миланнинг «Интер» клуби бош мураббийи Кристиан Киву жамоанинг жорий мавсумда ички аренадаги муваффақиятли иштироки омиллари ҳақида тўхталиб ўтди.

«Нерадзуррилар» мавсумни «олтин дубль» билан якунлашга яқин турибди. Сешанба куни миланликлар ўз майдонида «Комо» устидан ғалаба қозониб (жавоб учрашувида 3:2), Италия кубоги финалига йўлланмани қўлга киритишди.

Ўйиндан кейинги матбуот анжуманида Киву жамоадаги муҳитга алоҳида тўхталди:

«Бизнинг сиримиз — жамоавий бирдамликда, клуб ва мухлисларнинг қўллаб-қувватлашида. Ҳамма ўзига бўлган ишонч қанчалик муҳимлигини тушуниб турибди. Футболчиларимиз бу муваффақиятга лойиқ: улар кўп йиллардан буён юқори чўққида қолишмоқда, лекин ҳамон тинимсиз меҳнат қилишда ва ўз орзулари сари интилишда давом этишяпти», — деди мураббий.

Маълумот учун, А Серияда чемпионлик масаласи яқин вақт ичида ҳал бўлиши мумкин. Турнир жадвалида пешқадамлик қилаётган «Интер» чемпионат тугашига беш тур қолганда иккинчи ўринни бўлишиб турган «Милан» ва «Наполи»дан 12 очкога ўзиб кетган.