Milanning «Inter» klubi bosh murabbiyi Kristian Kivu jamoaning joriy mavsumda ichki arenadagi muvaffaqiyatli ishtiroki omillari haqida to‘xtalib o‘tdi.
«Neradzurrilar» mavsumni «oltin dubl» bilan yakunlashga yaqin turibdi. Seshanba kuni milanliklar o‘z maydonida «Komo» ustidan g‘alaba qozonib (javob uchrashuvida 3:2), Italiya kubogi finaliga yo‘llanmani qo‘lga kiritishdi.
O‘yindan keyingi matbuot anjumanida Kivu jamoadagi muhitga alohida to‘xtaldi:
«Bizning sirimiz — jamoaviy birdamlikda, klub va muxlislarning qo‘llab-quvvatlashida. Hamma o‘ziga bo‘lgan ishonch qanchalik muhimligini tushunib turibdi. Futbolchilarimiz bu muvaffaqiyatga loyiq: ular ko‘p yillardan buyon yuqori cho‘qqida qolishmoqda, lekin hamon tinimsiz mehnat qilishda va o‘z orzulari sari intilishda davom etishyapti», — dedi murabbiy.
Ma’lumot uchun, A Seriyada chempionlik masalasi yaqin vaqt ichida hal bo‘lishi mumkin. Turnir jadvalida peshqadamlik qilayotgan «Inter» chempionat tugashiga besh tur qolganda ikkinchi o‘rinni bo‘lishib turgan «Milan» va «Napoli»dan 12 ochkoga o‘zib ketgan.
