Ўзбекистон Суперлигасининг 9-туридан ўрин олган баҳслар старт олмоқда. Бугун мухлислар турнинг марказий ўйинига гувоҳ бўлишади. Мазкур баҳсда турнир жадвалида пешқадам бўлиб турган «Пахтакор» жамоаси бешинчи ўринни эгаллаб турган «Бухоро» клуби меҳмони бўлади.

Ҳар икки жамоа мавсумни яхши бошлади, дейиш мумкин. «Пахтакор» ўзи ўтказган 8 та ўйиннинг 7 тасида ғалаба қозонди. Шунингдек, жамоа сафарда ўтказган барча ўйинларида ғалаба қозонгани эътиборга молик. «Шерлар» сафарда мағлуб этган жамоалар ичида амалдаги чемпион «Нефтчи» ҳам борлиги ушбу ғалабалар нуфузини янада оширади.

Ўз навбатида, «Бухоро» жамоаси ҳам бу йил меҳмон сифатида ўтказган бирорта ўйинида мағлубиятга учрамаган. Александр Хомяков бошқарувидаги клуб жорий мавсум Бухорода кечган ўйинларда «Қўқон-1912», «Қизилқум», «Динамо» каби жамоаларни мағлуб этди. Шунингдек, «Хоразм» жамоаси билан дуранг ўйнади. Шундан хулоса қилиш мумкинки, «Бухоро» ўз майдонида исталган клубга жанг таклиф қила олади.

Бундан ташқари ўтган мавсумда «Бухоро» жамоаси Ўзбекистон кубоги финалида «Пахтакор»га аламли тарзда мағлуб бўлган эди. Шундай экан, бу галги учрашувга уй эгалари юқори мотивация ва реванш олиш кайфияти билан тушишлари табиий.

Хўш, турнинг марказий ўйинида бизни нима кутмоқда? «Пахтакор» сафарда ғалаба қозониб етакчилигини мустаҳкамлайдими ёки «Бухоро» ўз мухлислари қаршисида Кубок финалидаги мағлубият учун реванш оладими?

Бу саволга бугун 20:15 да старт оладиган «Бухоро» — «Пахтакор» ўйини орқали жавоб топамиз.