Мадриднинг «Реал» клуби чап қанот ҳимоячиси Альваро Каррерас Лондоннинг «Арсенал» клуби қизиқишлари доирасига тушди. 23 ёшли футболчининг трансферига «канонирлар» устози Микель Артетанинг шахсан ўзи қизиқиш билдирмоқда.
El Nacional нашрининг хабар беришича, Артета испаниялик латераль Лондон жамоасида «Реал»дагига қараганда кўпроқ ўйин амалиётига эга бўлишига ишонмоқда. «Арсенал» раҳбарияти бўлажак трансфер ойнасида мудофаанинг чап қанотини кучайтиришни асосий мақсад қилиб белгилаган.
Маълумот учун, Альваро Каррерас ўтган йилнинг июль ойида 50 миллион евро эвазига «Бенфика»дан Мадрид клуби сафига келиб қўшилган эди. Transfermarkt портали футболчининг айни дамдаги бозор қийматини 60 миллион еврога баҳоламоқда.
Ҳимоячининг «қироллик клуби» билан амалдаги шартномаси 2031 йилга қадар мўлжалланган. Эслатиб ўтамиз, айни пайтда «Арсенал» АПЛ турнир жадвалида пешқадамлик қилмоқда, бироқ «Манчестер Сити» уларни таъқиб қилишда давом этмоқда. «Реал» эса Ла Лигада «Барселона»дан кейинги иккинчи ўринни эгаллаб турибди.
