Madridning «Real» klubi chap qanot himoyachisi Alvaro Karreras Londonning «Arsenal» klubi qiziqishlari doirasiga tushdi. 23 yoshli futbolchining transferiga «kanonirlar» ustozi Mikel Artetaning shaxsan o‘zi qiziqish bildirmoqda.

El Nacional nashrining xabar berishicha, Arteta ispaniyalik lateral London jamoasida «Real»dagiga qaraganda ko‘proq o‘yin amaliyotiga ega bo‘lishiga ishonmoqda. «Arsenal» rahbariyati bo‘lajak transfer oynasida mudofaaning chap qanotini kuchaytirishni asosiy maqsad qilib belgilagan.

Ma’lumot uchun, Alvaro Karreras o‘tgan yilning iyul oyida 50 million yevro evaziga «Benfika»dan Madrid klubi safiga kelib qo‘shilgan edi. Transfermarkt portali futbolchining ayni damdagi bozor qiymatini 60 million yevroga baholamoqda.

Himoyachining «qirollik klubi» bilan amaldagi shartnomasi 2031 yilga qadar mo‘ljallangan. Eslatib o‘tamiz, ayni paytda «Arsenal» APL turnir jadvalida peshqadamlik qilmoqda, biroq «Manchester Siti» ularni ta’qib qilishda davom etmoqda. «Real» esa La Ligada «Barselona»dan keyingi ikkinchi o‘rinni egallab turibdi.