Мадриднинг «Реал» клуби бош мураббийи Альваро Арбелоа жамоанинг ички интизоми ва ўйинларга бўлган муносабати борасидаги муаммоларга яна бир бор тўхталди.
Сешанба куни «қаймоқранглилар» ўз майдонида «Алавес» устидан 2:1 ҳисобида ғалаба қозонган бўлса-да, майдонда унчалик ишончли ўйин кўрсата олишмади. Madrid Universal нашрининг хабар беришича, Арбелоа учрашувдан сўнг футболчиларга қатъий огоҳлантириш берган.
«Менинг жамоага йўллаган мурожаатим жуда оддий ва тушунарли. «Реал»да ўз талаблари ва жиддий масъулият бор. Агар кейинги мавсумда зафар қучишни истасак, яхшилашимиз керак бўлган жиҳатлар талайгина. Энг аввало, интизом даражасини оширишимиз шарт. Жамоа рақибнинг кимлиги ва ўйиннинг аҳамиятидан қатъи назар, ўз олдига максимал талабларни қўйиши лозим», — деди мутахассис.
