Мадриднинг «Реал» клуби бош мураббийи Альваро Арбелоа ярим ҳимоячи Эдуардо Камавинганинг манзилига мухлислар томонидан бўлаётган эътирозларга тўхталди.
Сешанба куни Ла Лига доирасида кечган «Алавес»га қарши баҳсда «Сантьяго Бернабеу» стадионига йиғилган ишқибозлар захирадан майдонга тушган франциялик футболчини ҳуштаклар билан кутиб олишди. Мухлисларнинг бундай норозилигига Камавинганинг яқинда Чемпионлар лигаси чорак финалида «Бавария»га қарши ўйинда четлатилгани ва шу сабабли жамоанинг мусобақадан чиқиб кетгани сабаб бўлган эди.
Арбелоа матбуот анжуманида футболчисини қўллаб-қувватлади:
«Камавинга ёш бўлишига қарамай, кучли характерга ва катта тажрибага эга. Бизга унинг ёрдами керак бўлганда, у ҳар доим жангга киришга тайёр. Эдуардо «Реал» учун муҳим футболчи бўлиб келган ва шундай бўлиб қолади. Майдонда қанча вақт ҳаракат қилишидан қатъи назар, у доим жамоага фойда келтиради. У мураббийлар штаби ва бутун клубнинг ишончига сазовор бўлган. Ишончим комил, мухлислар ҳам унга ишонишади», — деди мутахассис.
Эслатиб ўтамиз, «Алавес»га қарши ўйиндан сўнг Камавинга стадион трибуналари олдига бориб, мухлислардан шахсан узр сўраган эди.
