«Манчестер Сити» бош мураббийи Хосеп Гвардиола Англия Премьер-лигасидаги турнир ҳолати жамоага руҳий босим ўтказаётгани ҳақидаги саволга жавоб берди.

Эслатиб ўтамиз, аввалроқ «шаҳарликлар» ўз майдонида «Арсенал»ни мағлуб этиб (2:1), чемпионлик учун интригани энг юқори нуқтага олиб чиққан эди. Таниқли инсайдер Фабрицио Романо испаниялик мутахассиснинг қуйидаги сўзларини келтирмоқда:

«Хавотир оляпманми? Асло! Мен ўтган мавсумда асабийлашгандим. Ўшанда босим жуда кучли эди... Ҳозир эса ҳар қачонгидан ҳам хотиржаммиз, ҳатто «Арсенал» устидан қозонилган ғалабадан кейин ҳам хотиржамликни йўқотмадик», — деди Гвардиола.

Айни дамда «Манчестер Сити» АПЛ турнир жадвалида 67 очко билан иккинчи ўринни эгаллаб турибди. Пешқадам «Арсенал» ҳисобида 70 очко бор, бироқ лондонликлар «Сити»га қараганда битта кўп ўйин ўтказишган. Бу эса Гвардиола шогирдларида йўқотилган очколар бўйича устунлик борлигини англатади.

Маълумот учун, Англиянинг амалдаги чемпиони «Ливерпуль» ҳисобланади.