El Chiringuito TV журналисти Хуанфре Санс Мадриднинг «Реал» клуби вингери Винисиус Жуниорни жамоа ичида носоғлом муҳит яратганликда айблади ва клуб раҳбариятини бразилиялик футболчини сотиб юборишга чақирди.

Ла Лиганинг 33-тури доирасида «Алавес»га қарши кечган баҳсда (2:1) «Сантьяго Бернабеу» мухлислари ўйин бошида Винисиус ва Килиан Мбаппени ҳуштакбозлик билан кутиб олишди. Винисиус учрашувда гол киритгач, мухлислардан узр сўраб, клуб эмблемасини ўпган бўлса-да, эксперт буни етарли эмас деб ҳисобламоқда.

«Мен «Реал» учун энг яхши ечим — ушбу футболчини сотиш эканига қатъий ишонаман. Чунки Хаби Алонсо давридаги «Барселона»га қарши ўйин куни у кийиниш хонасида ички бўлиниш келтириб чиқарди, ҳокимиятни ўз қўлига олди ва ҳеч ким уни тўхтатиб қолмади», — деди Санс.

Журналистнинг фикрича, футболчининг майдондаги яхши ўйини унинг номақбул хулқ-атворини ёпиб келган, бироқ энди вазият ўзгарган:

«Бугунги хатти-ҳаракати — бу унинг хатоларини тан олиш усули, холос. Лекин менимча, у барча имкониятларини тугатиб бўлди. Клуб унинг яхши ўйини учун ёмон хулқига чидаб келаётган эди. Ишлар яхши юришганда баъзи ишлари кечириларди, аммо натижалар ёмонлашганда, унинг салбий томонлари устунлик қила бошлади. Омадсиз мавсумлар фонида қатъий чоралар кўриш керак деб ҳисоблайман».