«Манчестер Юнайтед» клуби собиқ ярим ҳимоячиси Поль Погба португалиялик мутахассис Жозе Моуриньо қўл остидаги фаолияти ва улар ўртасидаги муносабатлар ҳақида гапириб берди.
«Менда ҳеч қайси мураббий билан муаммо йўқ. Уларни доим ҳурмат қиламан. Улар — бошлиқ ва менга нима қилиш кераклигини айтишади. Бошида ҳаммаси ажойиб эди, доим ёзишиб турардик. Жозе — қизиқарли ва ўзига хос инсон. Менимча, кейинчалик жароҳатлар орадаги муносабатлар совушига сабаб бўлди. Оммавий ахборот воситалари эса доимий равишда ундан мен ҳақимда — «Поль, Поль, Поль» деб сўрайвергани унинг ғазабини келтирган бўлса керак», — деди француз футболчиси Рио Фердинанднинг подкастида.
Эслатиб ўтамиз, Поль Погба 2016–2018 йиллар давомида «Манчестер Юнайтед»да Жозе Моуринью қўл остида тўп сурган. Ушбу даврда «қизил иблислар» Лига Кубоги, Англия Суперкубоги ва Европа Лигасида ғолиб чиқишган.
