Ўзбекистон Суперлигасининг 9-турида Термизда ўтган «Сурхон» — «Машъал» учрашуви драматик сценарий асосида кечди. Майдон эгалари иккинчи бўлим сўнггида камбэк амалга ошириб, 2:1 ҳисобида ғалаба қозонди.

Биринчи бўлимда «Сурхон» фаолроқ ҳаракат қилди ва бир қатор хавфли вазиятлар яратди. Стефан Чинеду, Абдуллажонов ҳамда бошқа футболчиларда имкониятлар бўлди, аммо гол урилмади. Меҳмонлар ҳам қарши ҳужумларда хавфли ҳаракат қилди, бироқ дарвозабон ишончли ўйнади.

Иккинчи таймда эса ҳисоб очилди. 60-дақиқада VAR орқали белгиланган пенальтини Самандар Очилов аниқ ижро этиб, «Машъал»ни олдинга олиб чиқди — 0:1.

Шундан кейин «Сурхон» ҳужумларни кучайтирди. 83-дақиқада Стефан Чинеду ҳисобни тенглаштирди — 1:1. Ушбу голдан кейин майдон эгалари руҳланиб кетди ва босимни янада оширди.

Учрашувнинг сўнгги дақиқаларида эса ҳал қилувчи эпизод юз берди. 90+1-дақиқада захирадан тушган Камрон Юсупов жамоасини олдинга олиб чиқиб, «Сурхон»га ғалабани тақдим этди — 2:1.

Шу тариқа, «Сурхон» иродали ўйин намойиш этиб, мухлисларини қувонтирди ҳамда ўз очколарини 11 очкога етказиб, 9-ўринга кўтарилиб олди.

"Машъал" эса кетма-кет тўққизинчи мағлубият туфайли ноль очко била энг сўнгги поғонани эгаллаб турибди.

Ўзбекистон Суперлигаси, 9-тур
22 апрель 2026 йил. Термиз
«Сурхон» — «Машъал» 2:1 (0:0)
Голлар: Самандар Очилов 60, пен. (0:1), Стефан Чинеду 83 (1:1), Камрон Юсупов 90 (2:1)