Дарвозабон Жеймс Траффорд жорий мавсум якунланганидан кейин «Манчестер Сити»ни тарк этиши мумкин. Goal нашрининг маълумотларига кўра, голкиперни сотиб олишга «Ливерпуль» ва «Челси» қизиқиш билдирмоқда.

Футболчининг ўзи кўпроқ ўйин амалиётига эга бўлишни истагани учун Манчестер клубидан кетишга тайёр — «шаҳарликлар»нинг асосий дарвозабони Джанлуиджи Доннарумма ҳисобланади.

Жеймс Траффорд 2025 йилда «Бёрнли»дан «Манчестер Сити»га 31 миллион евро эвазига ўтган эди. Унинг шартномаси 2030 йилнинг 30 июнигача мўлжалланган.

Жорий мавсумда дарвозабон «шаҳарликлар» сафида барча турнирларда 14 та ўйин ўтказиб, ўз дарвозасидан 10 та гол олиб чиқди, 7 та учрашувда эса дарвозаси дахлсизлигини сақлаб қолди. Transfermarkt портали Траффорднинг қийматини 25 миллион еврога баҳоламоқда.