«Манчестер Юнайтед» сардори Бруну Фернандеш катта эҳтимол билан яқинлашиб келаётган трансфер ойнасида жамоасини ўзгартирмайди. Журналист Самуэль Лакхёрстнинг хабар беришича, «қизил иблислар» раҳбарияти ярим ҳимоячига уни келаётган ёзда ҳар қандай ҳолатда ҳам сотишмаслигини аниқ тушунтирган.

Манкунианликлар бошлиқлари португалиялик футболчини лойиҳанинг асосий фигураси деб ҳисоблашади ва унинг атрофида янги жамоа қуришга тайёр. Клубда 31 ёшли футболчининг жорий мавсумдаги ўйинидан жуда мамнунлар. Фернандеш ҳозирда Премьер-лиганинг ассистлар (голли узатмалар) бўйича рекордини янгилаш сари бормоқда — унинг ҳисобида 30 та ўйинда 18 та голли пас бор. Шунингдек, хавбек 8 та голга ҳам муаллифлик қилган.

Брунунинг амалдаги шартномаси 2027 йилгача мўлжалланган ва унда келишувни яна бир йилга автоматик тарзда узайтириш банди мавжуд.