«Барселона» вингери Ламин Ямалнинг жароҳати жиддий бўлиб чиқиши мумкин. 18 ёшли футболчи Ла Лига доирасида чоршанба куни бўлиб ўтган «Сельта»га қарши ўйиннинг биринчи бўлими охирида захирага олинган эди. ESPN маълумотларига кўра, Ямал клубдаги мавсумнинг қолган қисмини ўтказиб юбориш хавфи остида турибди, шунингдек, унинг Испания терма жамоаси сафида Жаҳон чемпионатининг илк ўйинидаги иштироки ҳам сўроқ остида қолмоқда.
Айнан Ламин Ямал «Сельта» билан баҳсда «кўк-анорранглилар»нинг ягона голига муаллифлик қилган эди.
«Барселона» Ла Лига турнир жадвалида «Реал»ни 9 очкога ортда қолдирган ҳолда пешқадамлик қилмоқда. Ҳар икки жамоанинг чемпионат якунига қадар яна 7 тадан ўйини бор.
15 июнь куни Испания терма жамоаси ЖЧ-2026 гуруҳ босқичининг илк турида Кабо-Верде билан тўқнаш келади. 21 ва 27 июнь кунлари эса «қизил фурия» мувофиқ равишда Саудия Арабистони ва Уругвай билан баҳс олиб боради.
Бошқа бир манбанинг хабарига кўра, Ямал тахминан беш ҳафтани ўтказиб юборади.
