«Barselona» vingeri Lamin Yamalning jarohati jiddiy bo‘lib chiqishi mumkin. 18 yoshli futbolchi La Liga doirasida chorshanba kuni bo‘lib o‘tgan «Selta»ga qarshi o‘yinning birinchi bo‘limi oxirida zaxiraga olingan edi. ESPN ma’lumotlariga ko‘ra, Yamal klubdagi mavsumning qolgan qismini o‘tkazib yuborish xavfi ostida turibdi, shuningdek, uning Ispaniya terma jamoasi safida Jahon chempionatining ilk o‘yinidagi ishtiroki ham so‘roq ostida qolmoqda.

Aynan Lamin Yamal «Selta» bilan bahsda «ko‘k-anorranglilar»ning yagona goliga mualliflik qilgan edi.

«Barselona» La Liga turnir jadvalida «Real»ni 9 ochkoga ortda qoldirgan holda peshqadamlik qilmoqda. Har ikki jamoaning chempionat yakuniga qadar yana 7 tadan o‘yini bor.

15 iyun kuni Ispaniya terma jamoasi JCH-2026 guruh bosqichining ilk turida Kabo-Verde bilan to‘qnash keladi. 21 va 27 iyun kunlari esa «qizil furiya» muvofiq ravishda Saudiya Arabistoni va Urugvay bilan bahs olib boradi.

Boshqa bir manbaning xabariga ko‘ra, Yamal taxminan besh haftani o‘tkazib yuboradi.