«Барселона» «Интер» ҳимоячиси Алессандро Бастони билан шартнома имзолашга тайёргарлик кўрмоқда, деб хабар беради Mundo Deportivo.
Манбага кўра, Ла Лига жамоаси 27 ёшли Италия терма жамоаси аъзоси билан беш йиллик шартнома имзоламоқчи. Шу билан бирга, футболчининг ўзи «Барселона»га ўтишни амалга ошириш учун «қўлидан келган барча ишни» қилади. Жумладан, у каталонияликларга молиявий чекловлар доирасида қолишга ёрдам бериш учун пастроқ маошга ҳам рози бўлган.
Дастлабки маълумотларга кўра, трансфер суммаси 75 миллион еврони ташкил этади.
Бастони 2017 йилнинг августидан бери «Интер»да ўйнаб келмоқда. Унинг шартномаси 2028 йилнинг 30 июнига қадар мўлжалланган.
2025/26 йилги мавсумда ҳимоячи 37 та ўйинда майдонга тушиб, иккита гол урди ва олтита голли узатмани амалга оширди.
Transfermarkt футболчининг трансфер қийматини 70 миллион еврога баҳоламоқда.
