«Челси» собиқ бош мураббийи Энцо Мареска «Манчестер Сити» бошқарувини қўлга олиш борасида Хосеп Гвардиоланинг ўрнини босишга асосий номзод бўлиб турибди.
The Guardian нашрининг ёзишича, Мареска ва «Манчестер Сити» раҳбарияти ўртасида аллақачон музокаралар бошланган ва уларни «ижобий» деб тавсифлаш мумкин. Шу билан бирга, «шаҳарликлар» раҳбарияти Гвардиоланинг клубдаги 10 йиллик фаолиятидан сўнг эҳтимолий кетишига тайёргарлик кўрмоқда.
Эслатиб ўтамиз, Мареска илгари «Сити»да Гвардиола билан бирга ишлаган, шу боис клуб ички муҳитини жуда яхши билади. Жорий мавсумда италиялик мутахассис «Челси»ни бошқарган эди, бироқ 1 январь куни истеъфога чиқарилди. Мана уч ойдан ортиқ вақтдирки, Мареска ҳеч қайси клубда ишламаяпти. Таъкидланишича, «Сити» ва Мареска ўртасидаги музокаралардаги асосий тўсиқ — мураббийнинг «Челси» олдидаги эҳтимолий шартномавий мажбуриятлари бўлиши мумкин.
