«Chelsi» sobiq bosh murabbiyi Enso Mareska «Manchester Siti» boshqaruvini qo‘lga olish borasida Xosep Gvardiolaning o‘rnini bosishga asosiy nomzod bo‘lib turibdi.
The Guardian nashrining yozishicha, Mareska va «Manchester Siti» rahbariyati o‘rtasida allaqachon muzokaralar boshlangan va ularni «ijobiy» deb tavsiflash mumkin. Shu bilan birga, «shaharliklar» rahbariyati Gvardiolaning klubdagi 10 yillik faoliyatidan so‘ng ehtimoliy ketishiga tayyorgarlik ko‘rmoqda.
Eslatib o‘tamiz, Mareska ilgari «Siti»da Gvardiola bilan birga ishlagan, shu bois klub ichki muhitini juda yaxshi biladi. Joriy mavsumda italiyalik mutaxassis «Chelsi»ni boshqargan edi, biroq 1 yanvar kuni iste’foga chiqarildi. Mana uch oydan ortiq vaqtdirki, Mareska hech qaysi klubda ishlamayapti. Ta’kidlanishicha, «Siti» va Mareska o‘rtasidagi muzokaralardagi asosiy to‘siq — murabbiyning «Chelsi» oldidagi ehtimoliy shartnomaviy majburiyatlari bo‘lishi mumkin.
