«Манчестер Юнайтед» клуби Карлос Балебанинг ҳаракатларини кузатишда давом этмоқда, деб хабар беради The Athletic.

Шу билан бирга, «Брайтон» ярим ҳимоячиси «МЮ»нинг ушбу позиция учун шорт-листида (номзодлар рўйхатида) биринчи тоифага кирмайди. Манбанинг берган маълумотларига кўра, ўтган ёзда клуб камерунлик футболчи учун 75 миллион фунт тўлашга тайёр эди, бироқ «Брайтон» 100 миллиондан кўпроқ маблағ талаб қилган. Ҳозирда «Юнайтед» ярим ҳимоячининг мураккаб мавсумини инобатга олган ҳолда, 50 миллион фунт атрофидаги суммани оқилона деб ҳисобламоқда.

Қайд этилишича, «МЮ» мутахассислари Балебанинг статистик кўрсаткичларини, хусусан, майдонни қамраб олиши, тўп учун курашиш ва пас бериш маҳоратини жамоа даражасига мос деб баҳоламоқда.

Манкунианликлар, шунингдек, марказий ҳимоя чизиғини ҳам кучайтириш устида бош қотиришмоқда. Клуб «Тоттенхэм» аъзоси Микки ван де Вен номзодини ўрганиб чиқмоқда.

Маълумот учун, Балеба АПЛнинг жорий мавсумида 27 та ўйинда майдонга тушди ва самарали ҳаракатларни амалга оширмади. Ван де Вен эса Англия чемпионатининг 30 та ўйинида 4 та гол урди ва 1 та голли узатмани амалга оширди.