UFC ярим оғир вазн тоифаси рейтингида 10-поғонани эгаллаб турган ўзбекистонлик MMA жангчиси Богдан Гусков ўз вақтида чемпионликка асосий номзод бўлган Пауло Коста билан куч синашмоқчи эканини маълум қилди.

Гусков бразилиялик жангчининг рус йигитлари ҳақидаги гапларига тўхталиб, Коста айтган гапларига жавоб бериши кераклигини таъкидлади:

“Коста ҳозир машҳурлик чўққисида. У бизнинг дивизиондаги энг хавфли жангчилардан бирини мағлуб этди, Пауло билан октагонда жанг қилиш имконияти туғилса, қабул қилишга тайёрман. Боз устига, Пауло россиялик йигитлар ҳақида нимадир деганди. Мана сенга Россия вакили, Ўзбекистонда туғилиб ўсган йигит! Исталган вақтда октагонга чиқишга тайёрман. Коста айтган гаплари учун жавоб бериши керак”, дейди Гусков Red Corner MMA YouTube-каналига берган интервьюсида.

Кейинчалик бразилиялик жангчи ўзининг ижтимоий тармоқдаги саҳифасида Гусковга жавоб қайтарди:

“Яхши чорлов, Богдан. Мен рус халқини ҳурмат қиламан ва уларга нисбатан ҳеч қандай адоватим йўқ. Менинг гапларим кўпроқ чеченларга қаратилган эди”, деб ёзди Коста.

Маълумот учун, 12 апрель куни ўтказилган UFC 327 турнирида Коста россиялик Азамат Мурзакановни учинчи раундда нокаутга учратди. Бунгача у бошқа бир Россия вакили Роман Копиловни ҳам мағлуб этган эди. Кетма-кет ғалабалардан сўнг, бразилиялик жангчи ўрта вазн тоифаси чемпиони Хамзат Чимаэвни жангга жорлади. “Навбатдаги рақибим ‘чеченча тансиқ таом’ бўлишига умид қиламан. Кўрамиз, унинг мен билан ярим оғир вазнда тўқнаш келишга журъати етармикан”, дея фикр билдирганди Коста.

Эслатиб ўтамиз, Богдан Гусков UFC промоушени доирасида ҳозиргача 6 та жанг ўтказган. Уларнинг 4 тасида ғалаба қозонган, 1 баҳсда мағлуб бўлган, яна 1 жанг дуранг билан якунланган.