«Бавария» Бундеслига 31-тури доирасида «Майнц»га қарши кечган ўйиннинг иккинчи бўлимини худди чемпионлик тақдири шу баҳсга боғлиқдек ўтказди. Бундай фикрни Мюнхен жамоаси ярим ҳимоячиси Жамал Мусиала билдириб ўтди.

Эслатиб ўтамиз, «Бавария» биринчи бўлимдан сўнг 0:3 ҳисобида имкониятни бой бераётган эди, бироқ танаффусдан сўнг тўртта гол уриб, ғалабани қўлга киритди.

«Биз осонгина 0:3 ҳисобида ютқазиб, шу руҳда давом этишимиз мумкин эди, аммо бизда ҳамон ўйин тақдирини ўзгартириш иштиёқи борлиги ва ғалабани худди ундан соврин тақдири ҳал бўладигандек нишонлашимиз — бу ажойиб», — дея футболчининг сўзларини келтиради Мюнхен клуби матбуот хизмати.

«Бавария» ўтган тур натижаларига кўра муддатидан олдин чемпионликни нақд қилиб қўйган эди. Венсан Компани жамоаси «Майнц»га қарши баҳсга аллақачон Бундеслига ғолиби сифатида майдонга тушди.