Лондоннинг «Арсенал» клуби бош мураббийи Микель Артета АПЛнинг 34-туридан ўрин олган «Ньюкасл»га қарши ўйиндаги (1:0) мажбурий алмаштиришлар ҳақида тўхталиб ўтди.

Мазкур баҳсни Кай Хаверц ва Эберечи Эзе охиригача етказа олишмади. Хаверц 35-дақиқадаёқ Дьёкереш билан алмаштирилди ва майдонни тарк этаётиб анча тушкун ҳолатда кўринди. Эслатиб ўтамиз, германиялик футболчи ўтган йили тиззаси ва тизза ости пайларидан жиддий жароҳат олган эди. Эзе эса 54 дақиқа ҳаракат қилгач, ўзида ноқулайлик сезди.

«Бу шунчаки мушаклардаги оғриқ, биз буни жуда жиддий деб ўйламаймиз. Улар чоршанба кунги ўйинга тайёр бўлиш-бўлмаслигини кузатишимиз керак», — дея Артетанинг сўзларини келтиради The Athletic.

Кейинги ҳафтада «канонирлар»ни Чемпионлар лигаси ярим финали доирасида Мадриднинг «Атлетико» клубига қарши баҳс кутмоқда.