Франция терма жамоаси собиқ ярим ҳимоячиси Эммануэль Петининг фикрича, «ПСЖ» бош мураббийи Луис Энрике Люка Шевальенинг спорт формасини сақлаб туриши учун унга ўйин амалиёти бериши лозим.

Бундан аввалроқ россиялик дарвозабон Матвей Сафонов кетма-кет 18-марта «ПСЖ» асосий таркибида майдонга тушган эди.

Парижликлар устози Энрике аввалроқ шундай деганди:

«Футбол ақл бовар қилмас ўйин. Сиз мавсумнинг биринчи ярмида Шевальени доим танқид қилдингиз, мен эса уни ҳимоя қилдим. Энди эса савол туғиляпти: у қачон ўйнайди? Бу юқори даражадаги футбол».

Пети эса RMC телеканалидаги Rothen S’enflamme кўрсатувида вазиятга қуйидагича муносабат билдирди:

«Луис Энрике бизни чалғитяпти. У ҳам худди биз каби ўйлаяпти, лекин якунда Шевалье майдонга тушмаяпти, захирада ўтирибди. Менимча, қайсидир паллада унга яна бир бор имконият бериш керак.

Дарвозабон учун руҳий тетиклик ва концентрация жуда муҳим. Тасаввур қилинг, агар «Бавария»га қарши ўйинда Сафонов жароҳат олса, нима қиламиз? Шевалье руҳий жиҳатдан тайёр бўлиши шарт, бу жуда муҳим».