Косовалик марказий ҳимоячи Амир Ррахмани «Наполи» билан 2029 йилгача амал қиладиган янги шартнома имзолади. Бу ҳақда италиялик журналист Николо Скира хабар бермоқда.
Манбанинг таъкидлашича, келишув шартлари сўнгги бир неча кун ичида тўлиқ ишлаб чиқилган. Клуб ҳозирча ушбу келишув борасида расмий баёнот бергани йўқ. Янги шартномага кўра, Ррахмани йилига 3,8 миллион евро маош олади. Унга Туркия ва Саудия Арабистони клубларидан қизиқишлар бўлган эди, бироқ ҳимоячи Италияда қолишга қарор қилди.
Ррахмани «Наполи» сафига 2020 йилда «Верона»дан 15,3 миллион евро эвазига келиб қўшилган эди. Жорий мавсумда 32 ёшли футболчи 23 та ўйинда майдонга тушиб, 1 та гол ва 1 та голли узатмани амалга оширди, шунингдек, 5 бор огоҳлантирилди. Transfermarkt талқинига кўра, Ррахманининг бозор қиймати 12 миллион еврони ташкил этади.
