«Барселона»нинг собиқ ярим ҳимоячиси ва бош мураббийи Хави Эрнандес Каталония клуби ҳужумчиси Ламин Ямаль ҳақида юқори фикр билдирди ҳамда футболни тушуниш жиҳатидан ажралиб турадиган ўйинчиларни санаб ўтди.
«Ямаль — ҳақиқий иқтидор эгаси. У ҳозирнинг ўзидаёқ замонавий жаҳон футболидаги энг яхши ёки шулардан бири ҳисобланади. Энди ҳаммаси унинг кайфияти, энергияси ва тарих яратиш истагига боғлиқ. Барчаси унинг ўз қўлида.
Педри, Витинья, Алексис Мак Аллистер… Менимча, уч ёки тўрт нафар футболчи борки, улар жамоавий ўйинни тушуниш жиҳатидан энг яхшилар қаторига киради. Улар тўпни узатиш пайтидаёқ кейинги ҳужум ҳақида ўйлайди. Улар ҳеч қачон шунчаки пас бермайди — бу уларнинг ўйинни англаш даражаси.
Масалан, бундай қобилият Педрида бор. Яна мен Френки де Йонгни ҳам айтган бўлардим, менимча, уни жуда кам баҳолашади. Ўйин услуби жиҳатидан у менга ўхшайди», — деди Хави Ромарионинг YouTube каналига берган интервьюсида.













