"Манчестер Сити" устози Хосеп Гвардиола Эрлинг Холанднинг сермаҳсуллиги ҳақида ўз фикрлари билан ўртоқлашди. Ҳужумчи Премьер-лиганинг охирги икки турида "Арсенал" (2:1) ва "Бёрнли" (1:0) дарвозасини ишғол қилди — ҳар икки гол жамоасига ғалаба келтирди. Бундан аввалроқ норвегиялик футболчи Англия Кубоги доирасида "Ливерпуль"га қарши баҳсда (4:0) хет-трик қайд этган эди.
"Мармуш Африка кубогига кетган пайтда Холанд тўхтовсиз ҳар уч кунда ўйнашига тўғри келди — бунинг оқибатида унинг ўйин ритмига путур етди. Энди эса Эрлинг тўлақонли тикланиш имконига эга ва биз нимани кўряпмиз? У яна "учмоқда", голлар уриб, голли узатмаларни амалга оширмоқда!" — дея Гвардиоланинг сўзларидан иқтибос келтирмоқда City Report.
Шанба куни Англия Кубоги ярим финали доирасидаги "Саутгемптон"га (2:1) қарши ўйинда Холанд 71-дақиқада захирадан майдонга тушди, бироқ бу сафар гол ура олмади.
