«Ан-Наср» вингери Кингсли Коман «Бавария» ва «ПСЖ» жамоалари ўртасида танлов қилди. Мюнхенликлар ва парижликлар Чемпионлар Лигаси ярим финалида ўзаро тўқнаш келишади. Биринчи учрашув 28 апрель куни «Парк де Пренс»да, жавоб баҳси эса 6 май куни «Альянц Арена»да бўлиб ўтади.
«Ҳар икки клуб қалбимдан чуқур жой олган, аммо «Бавария» — мен учун янгироқ саҳифа. У ердан яқиндагина кетдим, кўплаб дўстларим ҳалиям ўша ерда, клубдаги инсонларни жуда яхши танийман. Шу сабабли, бу сафар «Бавария»га мухлислик қилишим аниқ. Бироқ мен фаворит ҳақида эмас, айнан шахсий алоқаларим ҳақида гапиряпман», — дея Команнинг сўзларини келтирмоқда Bayern & Germany.
«ПСЖ» — франциялик футболчининг жонажон клуби ҳисобланади, бироқ у катталар даражасида парижликлар сафида бор-йўғи тўртта ўйинда майдонга тушган. Мюнхен гранди шарафини эса футболчи 2015 йилдан 2025 йилга қадар ҳимоя қилган.
