«Ювентус» бош мураббийи Лучано Спаллетти ҳужумчи Душан Влаховичнинг ҳолати ҳақида гапирди.

26 ёшли футболчи ўтган йилнинг ноябрь ойидан бери майдонга тушишига тўсқинлик қилган жароҳатидан сўнг, март ойида сафга қайтган эди, бироқ кўп ўтмай яна лазаретга йўл олди. Якшанба куни сербиялик ҳужумчи А Серия доирасидаги «Милан»га қарши баҳснинг (0:0) сўнгги дақиқаларида захирадан майдонга тушди.

«Иккинчи бўлимда бизга Влахович типидаги ўйинчи керак эди, лекин у бу ҳафта етарлича машғулот ўтказмади. Душан узоқ вақт сафдан чиққан эди, шу сабабли уни барвақт майдонга тушириш таваккалчилик бўларди», — деди Спаллетти матбуот анжуманида.

Ҳужумчининг клуб билан амалдаги шартномаси жорий мавсум якунида ўз ниҳоясига етади.