Мюнхеннинг «Бавария» клуби ҳужумчиси Ҳарри Кейн Чемпионлар лигаси ярим финали доирасидаги «ПСЖ»га қарши баҳс олдидан ўз фикрлари билан ўртоқлашди. Жамоалар ўртасидаги дастлабки учрашув шу сешанба куни Парижда бўлиб ўтади.
Кейн Bild нашрига берган интервьюсида рақибнинг қарши ҳужумлари энг катта хавф эканини алоҳида таъкидлади.
«Агар биз контрпрессингни йўлга қўя олмасак, рақибнинг тезкор ҳужумларини назорат қилишда хатога йўл қўйсак ва тўпни осонлик билан олдириб қўйсак, бу «ПСЖ»нинг ишини енгиллаштиради. Бундай вазиятларда рақиб янада хавфли тус олади», — дейди инглиз ҳужумчиси.
Эслатиб ўтамиз, Венсан Компани шогирдлари ўтган шанба куни Бундеслига доирасида «Майнц»га қарши кечган драматик баҳсда (4:3) ғалаба қозонишди. Мюнхенликлар танаффусга қадар 0:3 ҳисобида мағлуб бўлаётиб, иродали ғалабани қўлга киритишган эди.
Маълумот учун, «Бавария» ва «ПСЖ» қарама-қаршилиги ғолиби финалда «Арсенал» ҳамда «Атлетико Мадрид» жуфтлиги ғолиби билан баҳс олиб боради. Париждаги учрашув Тошкент вақти билан тунги соат 00:00 да бошланиши режалаштирилган.
