«Ливерпуль» клуби собиқ сардори Стивен Жеррард жамоа ҳужумчиси Муҳаммад Салоҳнинг жароҳати ҳамда унинг мерсисайдликлар сафидаги келажаги борасида фикр билдирди.
Эслатиб ўтамиз, мисрлик футболчи «Кристал Пэлас»га қарши баҳсда жароҳат олган эди. Тиббий кўрикларга кўра, 33 ёшли ҳужумчининг тикланиши учун камида тўрт ҳафта вақт талаб этилади. Салоҳнинг жорий мавсум якунида клубни тарк этишини инобатга олсак, у «қизиллар» либосида бошқа майдонга тушмаслиги мумкин.
Жеррард TNT Sports телеканалига берган интервьюсида ушбу вазиятдан афсусда эканини яширмади.
«Бу Муҳаммаднинг сўнгги ўйини эдими? Агар чиндан шундай бўлса, бу жуда ачинарли. Салоҳ — клуб афсонаси. Барча унинг жамоадан ўзига муносиб тарзда кузатилишини истаган бўларди», — дейди Стивен Жеррард.
Маълумот учун, аввалроқ Салоҳ 2025/2026 йилги мавсум якунида «Ливерпуль» билан хайрлашиши ҳақида хабарлар берилган эди.
