Португалиялик мутахассис Рубен Аморим 2026/27 йилги мавсумда танаффус олишни режалаштирмоқда. Бу ҳақда A Bola нашри хабар бермоқда.
Шу йилнинг январь ойида «Манчестер Юнайтед»дан истеъфога чиқарилган мураббий ҳозирда ишсиз ҳисобланади. Қайд этилишича, бир қатор клублар, хусусан, АПЛ вакиллари томонидан қизиқишлар бўлаётганига қарамай, мутахассис яқин бир йилни ўз кўникмаларини ривожлантириш ва янги билимлар олишга сарфламоқчи. Ушбу даврда Аморим ўзи учун намуна деб билган бошқа мураббийлар билан тажриба алмашишни ва уларнинг иш услубларини ўзиники билан солиштиришни мақсад қилган.
Шу билан бирга, Аморим фақат хориждан жиддий таклиф тушган тақдирдагина ўз режаларини ўзгартириши мумкинлигини истисно этмаган. Мураббий Португалияга қайтиш вариантини кўриб чиқмаяпти ва фаолиятини чет элда давом эттириш ниятида.
