«Манчестер Юнайтед» сардори Бруну Фернандеш Англия Премьер-лигаси доирасидаги «Брентфорд»га қарши ўйинда навбатдаги самарали ҳаракатини амалга оширди. Португалиялик футболчининг ушбу баҳсда берган голли узатмаси унга нафақат Криштиану Роналду билан тенглашиш, балки тарихий натижани қайд этиш имконини берди.
Гап шундаки, Фернандеш АПЛ доирасида кетма-кет еттита ўйиндан бери майдонни гол ёки голли пас билан тарк этмоқда. «Манчестер Юнайтед» футболчилари орасида бундай узоқ давом этган маҳсулдорлик серияси охирги марта 2012/2013 йилги мавсумда — сэр Алекс Фергюсоннинг хайруллашув йилида Робин ван Перси томонидан қайд этилган эди.
«Қизил иблислар» навбатдаги турда «Ливерпуль»га қарши принципиал баҳсда майдонга тушишади. Агар Бруну ушбу ўйинда ҳам гол ёки пас муаллифига айланса, Фергюсон давридан кейинги мутлақ рекордчига айланади.
