Каталониянинг «Барселона» клуби «Манчестер Юнайтед» ҳужумчиси Маркус Рэшфорд бўйича музокараларни давом эттирмоқда. Sky Sport инсайдери Флориан Плеттенбергнинг хабарига кўра, «кўк-анорранглилар» инглиз футболчисини ўз сафида сақлаб қолиш ниятида, бироқ бунинг учун 30 миллион евро сарфлашни режалаштирмаяпти.
Ҳозирда Рэшфорд «Барса»да ижара асосида тўп сурмоқда ва шартномада уни айнан шу сумма эвазига сотиб олиш ҳуқуқи кўрсатилган. Каталонияликлар учун идеал вариант — ижара муддатини яна бир мавсумга узайтириш. Агар «Манчестер Юнайтед» бунга рози бўлмаса, «Барселона» трансфер суммасини сезиларли даражада туширишга ҳаракат қилади.
Жамоа бош мураббийи Ханси Флик 28 ёшли ҳужумчининг ўйинидан мамнун ва унинг жамоада қолишини қўллаб-қувватламоқда. Жорий мавсумда Рэшфорд Ла Лиганинг 28 та ўйинида майдонга тушиб, 7 та гол ва 6 та голли узатмага муаллифлик қилди.
