«Ливерпуль» клуби «ПСЖ»нинг 18 ёшли қанот ҳужумчиси Ибрагим Мбайе учун курашда пешқадамлик қилмоқда. Сенегаллик вингер ўзига берилаётган ўйин вақтидан норози бўлгани сабабли, келаётган ёзда Франция грандини тарк этиши мумкин. Бу ҳақда Caught Offside нашри хабар бермоқда.

Манба берган маълумотларга кўра, Мбайега «Ливерпуль»дан ташқари «Манчестер Сити», «Вест Хэм Юнайтед» ва «Брайтон» клублари ҳам қизиқиш билдирмоқда.

Жорий мавсумда Мбайе барча турнирларда 28 та ўйинда майдонга тушиб, битта гол ва иккита голли узатмани амалга оширди. Футболчининг клуб билан амалдаги шартномаси 2028 йилнинг ёзига қадар мўлжалланган. Transfermarkt портали маълумотларига кўра, футболчининг бозор қиймати 30 миллион еврони ташкил этади.